ජනාධිපති ලේකම් කාර්යාලයට 2022 වසරේ ජූලි මස 09 වනදා අයුතු ඇතුළු වීමක් කළ සිද්ධියේ ඇප මත මුදා හැර ඇති ප්‍රවීණ රංගනවේදිනි දමිතා අබේරත්න ඇතුළු කාන්තාවන් තිදෙනාට රුධිර සාම්පල ඩීඑන්ඒ පරීක්ෂණයක් සඳහා අධිකරණ වෛද්‍යවරයා හමුවට ලබන 29 යොමුවෙන ලෙස කොටුව මහේස්ත්‍රාත් තනූජා ලක්මාලි මහත්මිය ඊයේ (26) නියෝග කළාය.
පසුගිය මාර්තු මාසයේ දමිතා ඇතුළු කාන්තාවන් තිදෙනකුට එහි යන ලෙස පූර්වගාමී විනිසුරුවරයා කළ නියෝග ප්‍රකාරව ඇය එහි පෙනී සිට නැතැයි කොළඹ උතුර අපරාධ කොට්ඨාසය කළ කරුණු දැක්වීමෙන් අනතුරුව මහේස්ත්‍රාත්වරිය මේ නියෝගය සිදු කළාය.
ජනාධිපති ලේකම් කාර්යාලයේ තිබී හමු වූ සනීපාරක්ෂක තුවා හය සම්බන්ධයෙන් විමර්ශන කිරීමට රුධිර සාම්පල ලබා දෙන ලෙස සැකකාරියන් තිදෙනාට නියෝග කරන ලෙස කොළඹ උතුර අපරාධ කොට්ඨාසය අධිකරණයෙන් පසුගිය දිනයේ ඉල්ලීම් කළ අවස්ථාවේ දමිතා අබේරත්න වෙනත් නඩුවක් සම්බන්ධයෙන් බන්ධනාගාරගතව සිටි බව නීතිඥ තිළිණ වීරසිංහ මහතා අධිකරණයට දන්වා සිටියේය.
පෙර දින මෙලෙස නියෝග නිකුත් කෙරුණේ දමිතා අබේරත්න, නෝනා මුරින් සහ සචිනි කෞශල්‍යා යන කාන්තාවන් තිදෙනාටය.
මේ නඩුවේ 17 සැකකරු ඇප මත මුදා හැර ඇති කොස්වතේ මහානාම හිමි සිවුරු හැර ඇති බවත් ගිහි නම ගිහාන් දුමින්ද අමරසිරි ලෙස නඩු ගොනුවක් ඇතුළත් කරන ලෙසත් පොලිසිය අධිකරණයෙන් ඉල්ලා සිටියේය.
අප මත මුදා හැර ඇති අධිකරණයේ පෙනී නොසිටි හයවන සැකකරුට වරෙන්තු නිකුත් කළ මහේස්ත්‍රාත්වරිය ඇපකරුවන්ට නොතිසි නිකුත් කළාය.
මේ නඩුවේ ඇප මත මුදා හැර ඇති සැකකරුවන් වන රතිදු සේනාරත්න නොහොත් රැට්ටා, දුමින්ද නාගමුව, ජෝසප් ස්ටාලින්, වසන්ත සමරසිංහ, දමිතා අබේරත්න, වසන්ත මුදලිගේ, මංගල පුෂ්පකුමාර, ජීවන්ත පීරිස් පියතුමා ඇතුළු ඇප මත මුදා හැර ඇති සැකකරුවන් 41 දෙනෙක් අධිකරණයේ පෙනී සිටියහ. නීතිපති උපදෙස් සඳහා ලබන දෙසැම්බර් මස 13 යළි කැඳවන ලෙස කොටුව මහේස්ත්‍රාත්වරිය නියෝග කළාය.
– සුභාෂිණී සේනානායක
